Aulestad gjenopna

Kulturminister Anniken Huitfeldt stod for den offisielle gjenopninga i utandørsamfiet, Aulstads nye kulturarena. Her var det òg opplesing av Bjørnstjerne Bjørnsons brev og dessutan underhaldning av Herborg Kråkevik med ensemble.

Omvising i diktarheimen

Markeringa heldt fram med opning av sjølve Diktarheimen. Her vart Dronning Sonja teken imot av ”Bjørnstjerne og Karoline Bjørnson” i Kai Remlov og Kristin Kajanders skikkelsar. Etter omvisinga helsa Dronninga på oldebarn og tippoldebarn av Bjørnson, før ho fekk sjå nærare på utstillinga ”Ett menneskes sak er vår alles sak”, som er opna i låven.

Festframsyning på Maihaugen

I kveld vil Dronning Sonja oververe festframsyninga TRANSIT i Maihaugsalen. Edvard Hoem er vert for framsyninga, som er sett saman med tanke på å vise det store mangfaldet i Bjørnsons liv og dikting. Både samfunnsbyggjaren, debattanten, forfattaren og diktaren Bjørnson skal belysast gjennom varierte kulturinnslag med bl.a. Inge Eidsvåg, Tom Remlov, Shabana Rehman Gaarder, Ola Kvernberg og mange fleire.

"Måneskinskåpe opunder pol"

Etter framsyninga vil Dronninga oververe opninga av utstillinga ”Måneskinskåpen opunder pol” av samtidskunstnaren Borgny Farstad Svalastog.

Kunstnaren har late seg inspirere av Bjørnstjerne Bjørnsons dikting og har bl.a. laga ei rikt dekorert ”Måneskinskåpe”. Strofer frå diktet ”Det ligger et land mot den evige sne …” er attgjevne i den nedste borden i kåpa.

Nasjonalbiblioteket er hovudansvarleg for den nasjonale markeringa av Bjørnsonåret 2010.