Hopp til hovedinnhold

Besøkte Nor-Shipping

Hans Majestet Kongen besøkte Nor-Shipping 2011 på Noregs Varemesse i Lillestrøm torsdag. Shippingmessa omfattar både konferansar og ei omfattande utstilling, og Kongen besøkte fleire av utstillarane under besøket.
27.05.2011

Brasil har segla opp som ein viktig aktør innan petroleumsindustrien. Nor-Shipping markerte dette med ein eigen "Brazilian Day" onsdag, der ei rekkje brasilianske selskap deltok. Standen til brasilianske Petrobras var også den første Kong Harald besøkte under si vandring i messelokalet torsdag.

Kongen besøkte òg utstillingane til Norsk-Tysk Handelskammer, det bergensbaserte selskapet Frank Mohn og Den franske paviljongen, UBIFRANCE.

Kong Harald avslutta ved Den norske paviljongen, der Kongen møtte Tor Svanes, direktør i Jeppesen Norway, og leiaren for Norske Maritime Eksportører, Ole Henæs.

Oslo Byes Vel

Om kvelden var Kong Harald til stades da Selskabet for Oslo Byes Vel markerte 200-årsjubileet sitt med eit jubileumsarrangement i Oslo Rådhus.

Sidan etableringa i 1811 har selskapet arbeidd for utviklinga av eit godt bymiljø i Oslo, i tillegg til formidling og bevaring av historia og særpreget til byen. Blant konkrete tiltak er skiltinga av 250 bygningar og andre stader som kan knytast til ei viktig hending eller personar – eller som er viktige i kraft av alderen sin eller andre spesielle særtrekk.

 

Relaterte lenker

Del denne artikkelen på Facebook eller Twitter

Del på Twitter Del på Facebook