Møtte fylkesmennene
Hans Majestet Kong Harald var til stades på første del av fylkesmannsmøtet i Oslo i dag. På dagsorden stod samfunnets sårbarheit for terror.
6. desember 2011
For å kaste lys over temaet hadde Fornyings-, administrasjons- og kyrkjedepartementet invitert foredragshaldarar frå Etterretningstenesta i Forsvaret, Politiets sikkerheitsteneste (PST), Forsvarets forskingsinstitutt og Politihøgskolen.
Til stades var òg statsråd Rigmor Aaserud, departementsråd Ingelin Killengreen, sysselmannen på Svalbard og dei 18 fylkesmennene og assisterande fylkesmennene i landet.
Middag på Slottet
Møtet blir halde i R5 i Regjeringskvartalet og held fram utover dagen og morgondagen.
I kveld held Kongeparet den årlege middagen for fylkesmennene på Det kongelege slottet. Her vil òg Den Høgvørde Kronprinsen vere til stades.
Fylkesmannsembetet
Fylkesmannen er Kongens og regjeringas representant i fylket. Fylkesmannen har viktige styrings- og rettleiingsoppgåver overfor kommunane og skal føre tilsyn med den kommunale forvaltninga og den kommunale økonomien.
Fylkesmannsembeta har rundt 2250 tilsette, viser tal frå Fornyings-, administrasjons- og kyrkjedepartementet.
Fylkesmenn blir utnemnde av Kongen i statsråd.
