Hopp til hovedinnhold

Opna ambassaden i Kasakhstan

H.K.H. Kronprins Haakon opna i dag Noregs ambassade i Kasakhstan. Dette er Noregs første ambassade i Sentral-Asia og understrekar at området blir stadig viktigare, både bilateralt og internasjonalt.

05.02.2010

Ambassaden ligg i hovudstaden Astana og vil dekkje tre land i tillegg til Kasakhstan: Kirgisistan, Tadsjikistan og Turkmenistan. Dag Malmer Halvorsen er Noregs første ambassadør til Kasakhstan.

Kronprinsen hadde eit tett program også i forkant av opninga:

Opna seminar om energi og miljø

I dag tidleg opna Kronprins Haakon forretningsseminaret “Energy, Climate and the Environment”. I opningstalen sin understreka Kronprinsen behovet for rein og fornybar energi og potensialet for samarbeid mellom Noreg og Kasakhstan på dette området:

- We need to use energy more efficiently, we need more renewable energy, and we need cleaner energy. These are areas that both our countries are giving priority to, and where there may be opportunities for cooperation.

Etter seminaret reiste Kronprinsen til presidentpalasset Ak Orda, der han hadde samtalar med Kasakhstans president Nursultan Nazarbajev. Utanriksminister Jonas Gahr Støre deltok også i møtet med presidenten.

Foredrog om tusenårsmåla

Frå presidentpalasset drog Kronprins Haakon til Eurasia University, der han heldt foredrag om FNs tusenårsmål.

Etter foredraget hadde Kronprinsen møte med statsminister Karim Massimov, som òg var vert under den offisielle lunsjen som følgde.

Offisiell opning av ambassaden

Litt over klokka 15 lokal tid kom Kronprinsens følgje til den nye ambassaden. Kronprins Haakon la vekt på rolla den nye ambassaden har i den vidare utviklinga av forholdet mellom Noreg og Kasakhstan da han stod for den offisielle opninga:

- Norway´s embassy in Kazakhstan is established at an important juncture in the development of the relations between our countries. Kazakhstan is a valuable partner for Norway both politically and economically and I believe our new embassy in Astana will be crucial for strengthening the ties between our two countries.

Etter opningsseremonien fekk Kronprinsen og utanriksminster Gahr Støre ei omvising på ambassaden.

SYSLAB arbeidsmarknadssenter

SYSLAB er eit norskutvikla system som hjelper høgt kvalifiserte ledige inn i nye stillingar eller til å starte nye bedrifter. Senteret i Astana har vore i drift i eitt år, men fekk si offisielle opning da Kronprinsen besøkte senteret i ettermiddag. Målet er at metodikken skal bli ein del av den kasakhstanske politikken for å arbeide mot arbeidsløyse.

Kasakhstans nasjonalmonument – Bayterek

Kronprins Haakon besøkte også Bayterek Tower. Bayterek er Kasakhstans nasjonalmonument og eit populært utfluktsmål. Det 97 meter høge tårnet symboliserer legenda om den magiske fuglen Samruk som la egga sine i krona til en poppel. "Bayterek" tyder ”stor poppel”, og tårnkuppelen er forma som ei gyllen kule som kviler på nokre tre.

Her finst eit gullforgylt avtrykk av handa til presidenten. Å leggje handa si i avtrykket symboliserer lykke.


I kveld held ambassaden mottaking i fredspalasset Pyramiden. Dei norske jazzmusikarane i Mathias Eick Quartet skal stå for det kulturelle innslaget.

Del denne artikkelen på Facebook eller Twitter

Del på Twitter Del på Facebook