Opna ny sjømannskyrkje

Programmet starta alt fredag, da Kronprinsessa var til stades ved middagen som markerte starten på feiringa av den nye kyrkja. Skandinavar i området kunne òg glede seg over ei rekkje arrangement i går, laurdag.

Nytt bygg på ny tomt

Sjømannskyrkja har vore til stades i Miami sidan 1981. Den gongen var det i første rekkje sjøfolk og andre knytte til cruisenæringa som nytta seg av tilbodet til kyrkja. I dag er det færre sjøfolk, men om lag 4000 nordmenn er busette i området. I tillegg er svært mange skandinaviske turistar innom Miami – og sjømannskyrkja – kvart år.

Kyrkja var opphavleg lokalisert i hamna, men etter som det vart færre sjøfolk, vart denne plasseringa mindre praktisk. Den nye kyrkja ligg i Davie, vest for Fort Lauderdale, og rommar både leserom, bankettsal, kontor, konferanserom og bustader for tre familiar, i tillegg til kapellet.

Vigsling og offisiell opning

I dag, søndag, skjedde sjølve opninga. Seremonien starta med ei vigslingsgudsteneste, der Halvor Nordhaug, biskopen i Bjørgvin, forretta. Deretter stod Kronprinsesse Mette-Marit for den offisielle opninga av kyrkja.

I talen sin kalla Kronprinsessa sjømannskyrkjene våre "åndelege ambassadar" og understreka den viktige rolla deira som støtte og samlingspunkt for nordmenn i utlandet. Ho roste Sjømannskyrkjas evne til omstilling og den store dugnadsinnsatsen som ligg bak ei satsing som denne:

It shows the Seamen’s Church extraordinary ability to adapt to new challenges and realities and continue to meet the needs of Scandinavians in South Florida. It reflects the impressive capacity of the local Scandinavian community in mustering financial support, and the enduring volunteer spirit that has made the new church a reality. (...) In a broader perspective, this consecration also marks a revitalisation of centuries of strong bonds across the Atlantic, culturally and spiritually.

Namnetradisjon

Det er tradisjon å gje sjømannskyrkjer namn etter medlemmer av Kongefamilien. I Stockholm finn vi for eksempel Kronprinsesse Märthas kyrkje. Dronning Sonjas kyrkje og kultursenter ligg i Paris, mens sjømannskyrkja i New York er oppkalla etter Kong Olav. Sjømannskyrkja i Torrevieja heter Prinsesse Märtha Louises kyrkje, og Kong Haakons kyrkje ligg i København.