Knyt eit band

Barn og vaksne blir oppmoda til å etablere ein positiv relasjon til ein annan i løpet av kampanjeperioden. På denne måten håpar Raudekrossen at mange vil kjenne seg mindre einsame.

I opningstalen sin sa Kronprinsesse Mette-Marit blant anna:

"I Norge i dag sier 70 000 mennesker at de ikke har noen å snakke med når de har behov for det. 280 000 mennesker forteller at de ofte opplever ensomhet. Det er ikke nødvendig at det skal være slik.

Å være ensom er ikke det samme som å være alene. Men det er vondt å ikke ha noen å gå til når vi føler vi trenger det. Ensomhet kan ramme alle, og i ulike livssituasjoner."

St. Eystein

Tidligare på dagen besøkte Kronprinsesse Mette-Marit den katolske skolen St. Eystein. Skolen arbeider bevisst for eit inkluderande miljø på skolen, for å unngå einsemd og for å betre kontakten mellom unge og eldre. Elevane besøkjer blant anna Sentrum Sykehjem for å spele og syngje og knyte band mellom generasjonane.

Barna både song og fortalde om skolen sin for Kronprinsessa.

Vollen sykehjem

Da ho kom til Vollen sykehjem, fekk Kronprinsessa overrekt blomster av pensjonær Mary Sølvberg (87). Sølvberg vart sitjande til bords saman med Kronprinsessa mens det vart servert kaffi og kake. Det gjorde òg 11 år gamle Eline Bendiksen, som saman med venninner på Rønvik skole tok kontakt med Vollen sykehjem for å besøkje dei eldre etter at Raudekrossen hadde vore på skolebesøk.

Under besøket til Kronprinsessa på Vollen sykehjem vart det halde talar og sunge allsongar med blant anna 29 barn og fem tilsette frå Vollen barnehage som forsongarar.

Stopp Volden Cup

Kronprinsessa var òg til stades da Stopp Volden Cup vart sparka i gang i Glasshuset i Bodø i dag. Fotballturneringa samlar rundt 2000 barn i alderen 10-14 år.

Presidenten i Raudekrossen, Sven Mollekleiv, erklærte cupen for opna da 13-åringane Viktoria Skipnes og Henrik Ellingsen saman kasta ein signert fotball ut til publikum. Kronprinsesse Mette-Marit fekk ei signert Glimt-skjorte i gåve av Bodø-Glimt-spelarane Mounir Hamoud og Willis Forko.