Hopp til hovedinnhold

Statsbesøk fra Estland

Klokka 10.00 vart Estlands president ønskt offisielt velkommen på Slottsplassen. H.E. President Toomas Hendrik Ilves er på statsbesøk i Noreg etter invitasjon frå H.M. Kong Harald.

02.09.2014

Besøket starta på Slottsplassen i dag tidleg og blir avslutta med gallamiddag på Det kongelege slottet i kveld. Det er eit tett program i timane imellom.

Velkomstseremoni

Den Høgvørde Kronprins Haakon følgde Presidenten til Slottsplassen i dag tidleg, der han vart motteken av Kongeparet og Kronprinsesse Mette-Marit. Norske og estiske flagg omkransa plassen der seremonien vart gjennomført.

Gardens musikktropp spelte nasjonalsongane, før Presidenten – følgd av Hans Majestet – inspiserte ærestroppane.  Deretter var det offisiell fotografering i Fugleværelset, der også Prinsesse Astrid, fru Ferner slutta seg til.

Kransnedlegging

Tradisjonen tru var første programpost etter velkomsten nedlegging av krans på nasjonalmonumentet. Kong Harald og Dronning Sonja følgde Presidenten til Akershus festning, der han la ned krans på monumentet til minne om dei som fall under den andre verdskrigen.

Etter seremonien vart Presidenten følgd til Stortinget, der han avla besøk hos stortingspresident Olemic Thommessen. President Ilves møtte òg med statsminister Erna Solberg, etterfølgt av ein pressekonferanse.

Europakonferansen 2014

I ettermiddag er Toomas Hendrik Ilves hovudtalar på Europakonferansen som blir arrangert i Gamle festsal på Universitetet i Oslo. Dette er ei årviss hending vigd aktuelle europaspørsmål.

Det er 25 år sidan Berlinmuren fall. Gjennom den fredelege, «syngjande» revolusjonen sin gjekk Estland frå å vere ein del av Sovjetunionen til å bli ein sjølvstendig nasjon med medlemskap i både NATO og EU. Men krisa i Ukraina viser at fredeleg samarbeid på tvers av grensene i Europa ikkje er noko sjølvsagt. Presidentens foredrag har tittelen «25 years After – Still not whole and Free».


Etter foredraget vil Presidenten møte den estiske næringslivsdelegasjonen, som har ei rekkje møte med dei norske kollegaene sine i dag.

Gallamiddag

I kveld held Kongen og Dronninga gallamiddag på Det kongelege slottet til ære for Estlands president. Kronprinsparet og Prinsesse Astrid, fru Ferner vil òg vere til stades. Det er venta 192 til bords.



H.M. Kongens tale under gallamiddagen til ære for Estlands president, Toomas Hendrik Ilves. Redigerer: Ole Berg-Rusten / NTB Scanpix

Del denne artikkelen på Facebook eller Twitter

Del på Twitter Del på Facebook