Hopp til hovedinnhold

Opna nytt Fontenehus

H.K.H. Kronprinsessa opna i dag Fontenehuset Oslo Øst på Tøyen. Dermed har Oslo fått eit nytt permanent hus for menneske med psykiske lidingar, i eit sosialt felleskap med praktiske arbeidsoppgåver.

11.04.2013

Sidan 2009 har Fontenehuset Oslo Øst vore på flyttefot, men i dag vart innviinga av nye, permanente lokale feira – med Kronprinsessa og ordførar Fabian Stang til stades.

Fontenehuset er eit klubbhus for menneske med psykiske helseplager. Huset blir drive som ein klubb, og det er klubbmedlemmene som gjer den levande. Medlemmene utfører daglege arbeidsoppgåver knytte til drifta av huset – som matlaging, rekneskapsføring, praktisk handverk, skriveverksemd til internavisa – og alt som elles må til for å drifte klubben.

Det viktigaste målet til Fontenehuset er rehabilitering av medlemmene ut frå eigne behov og å styrkje sjansane deira til å oppnå eit likeverdig tilvære i samfunnet.

Landsomfattande

I dag finst det to Fontenehus i Oslo. Det andre ligg på Holbergs plass. Elles er det Fontenehus både i Stavanger, Bergen, Tromsø, Drammen, Kongsberg og Hønefoss.

Gjennom sitt mangeårige engasjement for psykisk helse har Kronprinsesse Mette-Marit besøkt Fontenehus fleire gonger tidlegare. Første gong var i 2004, da ho var beskyttar for TV-aksjonen Hjerterom, som gjekk til Rådet for psykisk helse og Kirkens Bymisjon.

I talen sin ved innviinga av Fontenehuset Oslo Øst i dag sa Kronprinsessa blant anna:

"Mennesker jeg har møtt der har fortalt meg om hvor mye Fontenehuset betyr for dem.
For noen har det vært et første skritt ut av isolasjonen.
For andre har det vært et springbrett ut i lønnet arbeid.

For mange har møtet med Fontenehuset gitt en opplevelse av å tilhøre et sted hvor man kan få være seg selv, hvor definisjonen på hva som er såkalt "normalt" er litt rausere enn ute i storsamfunnet.

Det er et sted med god takhøyde, og et felleskap som erkjenner at livet egentlig kan være nokså komplisert."

 

Del denne artikkelen på Facebook eller Twitter

Del på Twitter Del på Facebook