Biomarin næring i vekst
Kronprinsparet var på eit tredelt besøk til Ålesund i dag, med symposium, fisketrålar og bedriftsbesøk. Temaet var biomarin industri – ei ung næring med internasjonale ambisjonar.
Ålesundsområdet er kjent for innovative og viktige marine klyngjer. Dei seinare åra har det òg vakse fram ein ny biomarin industri i området. Dette har resultert i den biomarine klyngja LEGASEA, som består av meir enn 20 bedrifter. Kronprinsparet fekk i dag lære meir om denne klyngja og det internasjonale potensialet for den biomarine industrien på Nord-Vestlandet. Den Høgvørde Kronprins Haakon opna òg fagsymposiet ”Marine Proteins and Peptides Symposium 2016”.
Ung næring – internasjonale ambisjonar
Berekraftig og lønnsam utnytting av marin biomasse og restråstoff er det viktigaste målet for den biomarine klyngja LEGASEA. Klyngja har utspringet sitt i 20 bedrifter innan fangst, oppdrett og industriell foredling av marine oljar og ingrediensar i Møreregionen.
Nesten 10 % av den globale foredlinga av biomarine ingrediensar skjer i Møre og Romsdal. Når det gjeld konsentrat av omega-3, står industrien i fylket for heile 30 % av den globale produksjonen. Visjonen til klyngja er å bli verdsleiande gjennom ei berekraftig og lønnsam utvikling og utnytting av marine bioressursar og restråstoff i industriell skala.
I talen sin under opninga av morgonens fagsymposium la Kronprinsen vekt på at LEGASEA var eit godt eksempel på kva ei innovativ klyngje kan bety for eit land som Noreg.
– Our time is a time for change. Legasea is a good example of innovative clusters that redefine global challenges into national opportunities, sa Kronprinsen.
Kronprinsen peika òg på det aukande behovet i verda for tilstrekkeleg og sunn mat, og korleis mykje av løysinga på desse utfordringane ligg i havet.
Tur med trålar
Kronprinsparet fekk òg høve til ein tur om bord på fisketrålaren «Molnes». Dette er ein trålar som har teke steget inn i framtida og tek vare på alt råstoff frå fisken dei tek om bord. Fiskebåten er blant anna utstyrt med ein sentrifuge som er med på å gjere fiskeslo om til protein og fiskeolje.
Omega-3
Tilbake på land sette Kronprinsparet kursen mot bedrifta Epax, som er verdsleiande innan produksjon av omega-3. Kronprinsen og Kronprinsessa fekk ei omvising i produksjonslokala og ei innføring i dei innovative produksjonsmetodane ved bedrifta.
Aktuelle saker
Utnevnelse til St. Olavs Orden
Hans Majestet Kongen har utnevnt lege, programleder og artist Trond-Viggo Torgersen, Bergen, til Kommandør av Den Kongelige Norske St. Olavs Orden.
Dugnadsdykk i Tromsø
Den Høgvørde Kronprinsen møtte dugnadsdykkarar frå Tarevoktere og følgde deira arbeid med å fjerne kråkebollar og atterreise tareskog – eit av jordas viktigaste økosystem.