Statue av «Turdronninga»

Det finst knapt ein fjelltopp i kongeriket vår turglade Dronning ikkje har vore oppå. Poenget vart godt understreka av H.K.H. Kronprinsen, da han takka for statuen under avdukinga i dag.

Kunstnaren Kirsten Kokkin har laga bronseskulpturen. Han viser Dronning Sonja i turutstyr ta seg ein pause med sekken ved sida av seg. «Sokkelen» ho sit på, er ein stein – granitt frå Hedalen i Valdres.

Kokkin beskriv statuen slik:
– Det er Hennar Majestet Dronning Sonja av Noreg som sit og ser opp mot Slottet, ho ser på gjerninga si. Ho har lagt ryggsekken som ho ber, ved sida, ho har gått opp på enda ein topp, overvunne enda ei utfordring og kan reflektere med tankane på flukt over Noregs fjelltoppar.

Fem barnebarn stod for avdukinga av statuen. Foto: Lise Åserud, NTB scanpix.

Statuen er ei gåve til Dronningas 80-årsdag frå Den Norske Turistforening (DNT). Dronning Sonja har vore beskyttar for organisasjonen gjennom mange år og har personleg erfaring med mange av hyttene og turstiane deira rundt i landet.

Kronprins Haakon peika òg på at det er ein statue til inspirasjon:

– Denne statuen vil inspirere til at vi kjem oss opp og ut, om det så berre er ein søndagstur rundt Sognsvann eller ein ettermiddagstur her i parken. Forsking har nemleg vist at dei om er fysisk aktive, oftare har kjensler som glede og entusiasme. Kort sagt, dersom du vil vere lykkeleg, så hjelper det å komme seg ut. Og når du er på tur, så hugs å raste og reflektere. Det er viktig, det òg.

Kirsten Kokkin har òg laga ein annan av statuane i parken, nemleg den av Kronprinsesse Märtha. Ho  er utdanna ved Kunglega Konstakademin i Stockholm og bur i Colorado, USA.