Kofi Annan ført til grava
Den Høgvørde Kronprinsessa representerte Noreg da tidlegare generalsekretær i FN Kofi Annan vart gravlagd i dag. Annan vart ført til grava ved ei statsgravferd i Ghanas hovudstad Accra.
Mange ghanesarar har vist Kofi Annan den siste ære i Accra Conference Centre dei siste dagane. I dag var ei rekkje statsleiarar til stades under gravferda i Accra.
Kofi Annan var den 7. generalsekretæren i FN. Foto: Denis Balibouse, Reuters / NTB scanpix
Kofi Annan var generalsekretær i FN frå 1997 til 2006. I 2001 vart han saman med FN tildelt Nobels fredspris for å ha revitalisert FN og bidrege til ei betre organisert og fredelegare verd.
– Kofi Annan var ein leiar med ei mild stemme, ein klar bodskap og ein utrøytteleg innsats for ei internasjonal verd prega av internasjonal lov og humanisme. Bortgangen hans er eit tap for verda, livsverket hans vil lyse også for framtidige generasjonar, skreiv statsminister Erna Solberg da dødsfallet vart kjent.
Etter tida som generalsekretær i FN arbeidde Annan som fredsmeklar, blant anna i Syria. Han leidde også organisasjonen The Elders, ei gruppe eldre statsleiarar som arbeider for fred og menneskerettar, og The Kofi Annan Foundation.
Enka etter Kofi Annan, Nane Maria Annan, legg ned ein krans under seremonien på militærkyrkjegarden Burma Camp i Accra. Foto: Francis Kokoroko, Reuters / NTB scanpix
Æresvakter ber kista med Kofi Annan, sveipt i Ghanas flagg. Foto: Francis Kokoroko, Reuters / NTB Scanpix
Kofi Annan døydde 18. august etter å ha vore sjuk ei kort tid. Han vart 80 år gammal.
Aktuelle saker

For kvinners helse i 125 år
I dag markerer Norske Kvinners Sanitetsforening sin 125-årsdag. Hennes Kongelige Høyhet Kronprinsesse Mette-Marit sendte en digital hilsen til Sanitetskvinnene.

Møtte unge dyslektikere
Omtrent fem prosent har dysleksi, og like mange har dyskalkuli og spesifikke språkvansker. Fire unge med lærevansker fortalte i dag Hans Kongelige Høyhet Kronprinsregenten om sine utfordringer.