Aktiv i Lom

Og det var verkeleg mykje som gjekk føre seg på Loar. Her var barn i full aktivitet med både sykkel, fotball og stikkball. Nokon dreiv med snikring og lafting, mens andre spelte utesjakk – eller heldt på med prosjekt innandørs. 

Kronprins Haakon vart med og spelte fotball på Loar. Foto: Marius Gulliksrud, Stella Pictures

Kronprinsparet fekk helse på mange av barna på skulen – og ta del i gruppearbeid under besøket. Skulebarna vart òg med til Brubakken, der Kronprins Haakon skulle opne eit nytt trafikkmiljøtiltak utanfor porten til barnehagen.

Brubakken trafikkmiljøtiltak

– Det betyr mykje å ha ein god skuleveg, sa Kronprinsen, – der både foreldre og barn kan ferdast til og frå skule og barnehage i hyggelege og trygge omgjevnader. Det bidreg òg til at ein får rørt seg meir, noko som er godt for både kroppen, hovudet og sinnet.

Kronprinsen opnar Brubakken trafikkmiljøtiltak saman med Kronprinsesse Mette-Marit og ordføraren i Lom, Bjarne Eiolf Holø. Foto: Stian Lysberg Solum / NTB scanpix

– Derfor heng dette miljøtiltaket òg godt saman med det vi har fått høyre om på Loar skule i dag om aktiv læring. For vi lærer ikkje berre med hovudet. Vi lærer med heile oss. Vi tek inn kunnskap, erfaringar og inntrykk med både hovudet, kroppen, kjenslene og alle sansane våre.

Sykling på Lom helseheim

Det er ikkje berre aktivitet for dei unge i Lom. Også på eldresenteret er det lagt til rette for fysisk utfalding. Kronprins Haakon avslutta besøket i Lom på den lokale helseheimen, der sykling er ein del av aktivitetstilbodet for dei eldre.

Motiview-syklar er ein del av aktivitetstilbodet på Lom helseheim. Foto: Stian Lysberg Solum / NTB scanpix

Syklane er sette opp med skjermar som viser "kvar" ein syklar. Dermed kan dei eldre leggje trimturen til eksotiske stader – eller til velkjende vegar frå heimtraktene.

Mottaking

I kveld inviterer Kronprinsen og Kronprinsessa til mottaking på Gammal-Kleppe. På gjestelista står mange av dei Kronprinsparet møter under fylkesturen i Oppland, og mange som har vore med på å leggje til rette for dei mange fine opplevingane.

Kronprinsparet høyrer Tone Jorunn Tveito lokke til fest frå taket på ein av bygningane på Gammal-Kleppe. Foto: Tom Hansen, Hansenfoto.no

Lokale yrkesfagelevar frå kokk og servitør er med og steller i stand det heile. Dei får kunnig hjelp og instruksjon frå kjøkkensjefen og hovmeisteren på Slottet.

Held fram til Vågå

Kronprinsparet i Vågå