Heimkomsten 13. mai 1945
I dag er det 75 år sidan Kronprins Olav kunne vende heim etter 2. verdskrig. Eit hav av menneske ønskte han velkommen da han gjekk i land på Honnørbrygga i Oslo.
Kong Haakon og Kronprins Olav hadde måtta forlate landet 7. juni 1940. Den 8. mai 1945 kapitulerte Tyskland, og Noreg var endeleg fritt etter fem års okkupasjon.
Regjeringa i London hadde utnemnt Kronprins Olav til forsvarssjef i juni 1944, ei stilling han hadde fram til 15. juli 1945. Han overtok leiinga av dei norske styrkane og samarbeidet med dei allierte. Det var i kraft av stillinga si som forsvarssjef at Kronprinsen kom heim alt 13. mai, nesten ein månad før resten av Kongefamilien.
Kronprins Olav gjekk i land på Honnørbrygga i Oslo. Foto: NTB arkiv / Scanpix
Iført den britiske battleuniforma si gjekk Kronprinsen i land på Honnørbrygga i Oslo, der mange tusen var møtte fram for å ønskje han velkommen.
I open bil gjennom gatene
Kronprins Olav køyrde i open bil gjennom gatene i Oslo, omkransa av eit stort folkehav på veg opp til Slottet.
Kronprins Olav drog i open bil frå kaia til Slottet. Foto: NTB scanpix
Den kjende motstandsmannen Max Manus sat i framsetet som livvakt. Han fortalde seinare om kor nervepirrande køyreturen hadde vore. Han og dei andre tryggingsfolka frykta at det skjulte seg tyske snikskyttarar i folkemengda.
Leidd av politi på motorsyklar går bilkortesjen med Kronprins Olav opp Karl Johans gate mot Slottet. Foto: NTB arkiv / Scanpix
Hoffmarskalk Broch rådde Kronprinsen frå å flytte inn på Slottet, sidan kongebustaden var sterkt nedsliten og prega av okkupasjonsåra. Men Kronprins Olav flytta inn uansett, og fire dagar seinare stod han som einaste medlem av Kongefamilien på Slottsbalkongen da eit fritt Noreg feira nasjonaldagen.
Kronprins Olav helsar frå Slottsbalkongen etter heimkomsten 13. mai. Foto: Nikolai Ramm Østgaard / Arkivverket / NTB scanpix
Han kunne òg ønskje resten av regjeringa velkommen da dei kom til Oslo med det britiske skipet Andes 31. mai.
7. juni
Den 7. juni kom også Kong Haakon, Kronprinsesse Märtha og resten av familien heim til Noreg. Det var på dagen fem år etter at Konge og Kronprins hadde måtta forlate landet.
Aktuelle saker
Samarbeid i Seattle
- Gjennom århundrene har millioner av mennesker tatt med seg sine håp og drømmer til USA. Noen har kommet for å oppleve et eventyr, andre for å klare å overleve eller for å forbedre livet for seg selv og sin familie, sa Kronprinsen da han innledet besøket til Seattle.
Det kongelige hoffs årsrapport for 2023
Kongehusets aktiviteter gjennom året speiler Norge i dag. Kongefamiliens reiser til 47 kommuner, offisielle besøk til fem europeiske land, ulike arrangementer sammen med det norske forsvaret samt søkelys på landets beredskap, viser både hva som er viktig for Norge og hva Kongefamilien er engasjert i.