Julegudsteneste i Asker

Julegudstenesta vart innleidd med Grundtvigs salme "Det kimer nå til julefest", som vart skriven i 1817, og julebodskapen var det naturlege temaet for preika soknepresten heldt for kyrkjelyden.

Sokneprest Karoline Astrup heldt preika si over bodskapen i juleevangeliet. Foto: Sven Gj. Gjeruldsen, Det kongelege hoffet

Før juleevangeliet slik det står i Evangeliet etter Lukas, vart lese, song kyrkjelyden Alf Prøysens "Julekveldsvise" – ein kjær julesong som no er teken inn i salmeboka.

Forutan salmesongen til kyrkjelyden stod fiolinist Victoria Willumsen Lewis, solist Frida Lund-Larsen og kantor Ingvild Køhn Malmbekk for dei musikalske innslaga.

Fiolinisten Victoria Willumsen Lewis var blant solistane under julegudstenesta i Asker. Foto: Sven Gj. Gjeruldsen, Det kongelege hoffet

Gudstenesta vart avslutta ved at kyrkjelyden song «Deilig er jorden» – som opphavleg er ein folkemelodi nedteikna i tyske Münster i 1677.

Etter gudstenesta reiste Kronprinsfamilien til Skaugum for å feire julaftan saman med Kongeparet.

Kronprinsfamilien tok farvel med soknepresten på kyrkjetrappa. Foto: Sven Gj. Gjeruldsen, Det kongelege hoffet