Hopp til hovedinnhold

NM i yrkesfag i gang

H.K.H. Kronprinsessa var til stades da Yrkes-NM opna på Lillehammer i kveld. - Drillo og hans menn får nok større oppmerksomhet, men Yrkeslandslaget er et minst like viktig landslag., sa Kronprinsessa i helsinga si til deltakarane.

18.10.2010

I morgon startar dei mange øvingane i Yrkes-NM. Det blir yrkeskonkurransar i nesten 30 forskjellige fag. Det skal konkurrerast i sveising og billakkering, blomsterdekor og saum, møbelsnikring, kokkekunst og helsefag - for å nemne nokre.

I kveld vart meisterskapen markert med opningstilstelling på Maihaugen. Arrangementet vart offisielt opna av NHOs administrerande direktør, John. G Bernander, men først hadde Kronprinsessa ei helsing til deltakarane:

Like viktige som Drillos

I talen sin understreka Kronprinsessa kor viktige yrkesfaga er:

Samfunnet har bruk for de ferdighetene dere har utviklet. Den aller største ressursen Norge som nasjon har, er menneskene og deres kompetanse. Faglig sterke yrkesutøvere er avgjørende for å sikre velferdssamfunnet vårt fremover. Derfor er Yrkes-NM et enormt viktig mesterskap. (...)

Drillo og hans menn får nok større oppmerksomhet, men Yrkeslandslaget er et minst like viktig landslag. Norske ungdommer som skal velge utdanning trenger gode og sunne rollemodeller – slik som dere, sa Kronprinsessa .

Etter opninga fekk Kronprinsessa møte både deltakarar og dommarar frå ei rekkje ulike yrkesfag.

Yrkeslandslaget 2010

Innsatsen under Yrkes-NM er òg viktig for kven som skal representere Noreg under Euroskills (Yrkes-EM), som går av stabelen i Portugal i desember, og der Noreg skal stille med 16 deltakarar i 13 fag.

Yrkeslandslaget deltek òg i den største yrkeskonkurransen i verda, WorldSkills Competition (Yrkes-VM).

Fleire stopp i Lillehammer

Kronprinsessa hadde eit tett program i Lillehammer i dag. Før opninga av Yrkes-NM besøkte Kronprinsessa både SFO, biblioteket i byen og Raudekrossen i Lillehammer.

Kristin og Håkons aktivitetsskole

Dagen starta på Kristin og Håkons aktivitetsskole - ei skolefritidsordning som blir driven av Lillehammer Ishockeyklubb. Aktivitetsskolen held normalt til i Kristins hall, men ettersom dette er arenaen for årets Yrkes-NM, har barna uteaktivitetar denne veka.

I dag var det lagt opp til aktivitetspostar rundt heile Stampesletta , med både hekkeløp og bandy, fotball, spydkast og ball, og Kronprinsesse Mette-Marit fekk prøve seg i ei rekkje idrettsgreiner.

Bibliotek i 200 år

Lillehammer bibliotek feirar 200-årsjublieet sitt i år og gjennomfører ei rekkje arrangement under parolen "Mellom himmel og ord". Kronprinsessa fekk ei omvising i biblioteket, med særleg vekt på barne- og ungdomsavdelinga.

Raudekrossen i Lillehammer

På Raudekross-huset starta besøket i Arbeidsstua. Her møtte Kronprinsesse Mette-Marit ei gruppe eldre som møtest ei gong i veka for å drive med forming og handarbeid saman.

I Storstua fekk Kronprinsessa møte medlemmer i Barnas Raudekross og gruppa Flerkultur og inkludering, som blant anna driv leksehjelp og samtalegrupper. Det vanka òg vaflar, før Kronprinsesse Mette-Marit reiste til opninga av Yrkes-NM.

 

Del denne artikkelen på Facebook eller Twitter

Del på Twitter Del på Facebook