Kommunikasjonsstaben
Kommunikasjonsstaben har ansvaret for kommunikasjon på vegner av Kongehuset og Hoffet. Dette omfattar kontakt med media og tilrettelegging for pressa, bidrag til bøker, TV-produksjonar, offisiell fotografering og all kommunikasjon i Kongehuset sine eigne kanalar.
Staben støttar Kongehuset i deira kontakt med media, både i det offisielle virket og med å skjerme det private livet deira. Når dei kongelege har offisielle oppdrag, er det viktig å leggje til rette for gode møte med folk på staden. Kommunikasjonsstaben legg òg til rette for pressedekning i samarbeid med lokale arrangørar, Statsforvaltaren og kommunen i forkant av besøket. Ved oppdrag i utlandet er Utanriksdepartementet og norske ambassadar samarbeidspartnarar.
Kommunikasjonsstaben tek imot fleire tusen førespurnader kvart år. Målet er å svare raskt, korrekt og utfyllande, og å bidra til god tilrettelegging ved intervju og fotografering.
Eigne kanalar
Kommunikasjonsstaben har ansvaret for innhald og presentasjon i Kongehuset sine eigne kanalar. Nettstaden Kongehuset.no er ryggrada i formidlinga. Det finst òg nettsider på engelsk og samisk. Kommunikasjonsstaben har ansvaret for dei sosiale mediekanalane til Det kongelege hoffet. Instagram-kontoen til Kongehuset er den viktigaste av desse. I tillegg har Kongehuset ein Facebook-konto og ein YouTube-kanal med eigenproduserte filmar, offisielle talar og historisk materiale. All vekst og utvikling i sosiale medium skjer utan nokon form for betalt promotering.
Kommunikasjonsstaben bistår òg dei kongelege samlingane med drifta av deira Instagram-konto og Facebook-sider. I tillegg driv kommunikasjonsstaben fleire mindre Facebook-sider: Dronning Sonja KunstStall, Slottsparken, Oscarshall og Prinsesse Märtha Louises Fond.
Kommunikasjonssjef Guri Ofstad Varpe leier staben.