Nyopna Astruptunet

Astruptunet er eit museum og ein kunstnarheim som ligg i Jølster i Vestland. Dette var heimen til kunstnaren Nikolai Astrup og familien hans frå 1914 til han døydde i 1928. Astruptunet består av fleire bygningar, inkludert atelieret til Astrup, der mange av hans mest kjende verk vart skapte.

I fire år har prosjektet «Restaurering av Astruptunet og hagen» arbeidd med å restaurere bygningane og gjenskape hagen slik han såg ut då Astrup budde der med familien sin. Astruptunet ligg svært bratt til på sørsida av Jølstravatnet. Nikolai Astrup ønskte å dyrke eit stort mangfald av plantar til både mat, drikke og motiv for kunsten. For å lykkast med det, bygde han mellom anna opp terrassar i landskapet. I prosjektet har ein bygd opp att murar og torvgjerder, slik at skråninga er delt opp i dyrkbare terrassar slik dei var då Astrup dreiv. Ein har også arbeidd med å gjenopprette mykje av det store plantemangfaldet. Mellom anna er det no planta mange historiske bær- og fruktsortar, basert på podekvistar frå Astruptunet.

I tillegg til å føreta den offisielle nyopninga planta Dronninga ein rabarbraplante på tunet som blir ein del av det enorme plantemangfaldet på det nyrestaurerte tunet. I følgje gamle bestillingslister skal Astrup ha bestilt over 2000 ulike plantar til garden sin.

Fleire hundre hadde møtt opp for å vere med på den store dagen, og vestlandsvêret viste seg frå si beste side. Opninga baud både på talar frå ordførar i Sunnfjord kommune, Jenny Følling, og musikalske innslag frå Erlend Apneseth og Emil Horstad.