Alle gode krefter
DD.HH.KK Kronprinsen og Kronprinsessa var begge til stades da NHOs årskonferanse opna i dag. Mobilisering av alle gode krefter for å møte utfordringar samfunnet vårt står overfor, er den raude tråden gjennom ein dag med foredrag og diskusjon.
5. januar 2012
Det er økonomiske krisetider i Europa. Eldrebølgja set velferdsstaten under press. Sentraliseringstendensar endrar forholdet mellom regionane. Korleis kan offentleg og privat sektor samarbeide for å møte desse utfordringane best mogleg? Dette er hovudtemaet for konferansen i dag. Under overskriftene Berekraft, Konkurransekraft, Vekstkraft og Omstillingskraft held ei rekkje leiarar frå næringliv, politikk, akademia og samfunnsliv innlegg og foredrag.
Kronprins Haakon og Kronprinsesse Mette-Marit var til stades under opninga og første del av konferansen, der dei blant anna fekk høyre statsminister Jens Stoltenbergs innlegg. Det var NHO-president Kristin Skogen Lund som tok imot Kronprinsparet i Operaen i dag.
NHOs årskonferanse
Kvart år samlar NHOs årskonferanse om lag 1300 bedriftsleiarar, leiarar i offentleg sektor, toppolitikarar, akademikarar og ekspertar til foredrag og debatt. Dei siste åra har konferansen vorte halden på Operaen i Oslo.
