Bispevigsling i Stavanger
Hans Majestet Kong Haakon var til stades i Stavanger domkyrkje i føremiddag då Tor Magne Nesvik blei vigsla til ny biskop i Stavanger bispedøme.
22. november 2026

Kong Haakon blei teken imot på kyrkjetrappa og følgt inn i domkyrkja av preses i Bispemøtet, Olav Fykse Tveit, og leiaren i bispedømerådet, Helene Breivik Hellerdal. Deretter følgde den kyrkjelege prosesjonen med blant andre den nye biskopen i Stavanger bispedøme.
Tor Magne Nesvik blei tilsett som biskop i mai. Frå september og fram til i dag har han vore konstituert som biskop.
Når ein biskop skal tre inn i den nye rolla si, blir dette gjort ved ein høgtideleg vigslingsseremoni. Her avlegg den nye biskopen løfta sine, og den nye biskopen blir beden for.
I si første preike som biskop løfta Tor Magne Nesvik fram nestekjærleik og vennskap som svar på nokre av dei store utfordringane i vår tid.
– Jesu ord om «desse mine minste» blir verande ein av dei sterkaste talane i kulturen vår om nestekjærleiken. Ein tekst som tydeleg peikar på sjølve meininga med livet, på nestekjærleiken som målet for livet, sa Nesvik.
– Nestekjærleik betyr å sleppe andre menneske inn. Verkeleg inn. Nestekjærleik er vennskap. Og vennskap er terskellause, tidlause og grenselause.
Under gudstenesta medverka Stavanger domkor, Stavanger domkirke sitt guttekor, ei gruppe frå Stavanger domkirke sitt pikekor, domkantorane Markus Tähti Dunseth, Arnfinn Tobiassen og Ingrid Berg Tobiassen og ei gruppe messingblåsarar.
Kong Haakon var til stades i ei fullsett domkyrkje saman med gjester frå Det offisielle Noreg og utlandet. Besøket blei avslutta med ein lunsj på Hotel Atlantic i samband med vigslinga av ny biskop.







