Delte ut Abelprisen til fransk matematikar
Den Høgvørde Kronprinsen overrekte i dag den prestisjetunge Abelprisen for 2024 til Michel Talagrand for banebrytande bidrag til sannsynsteori og funksjonalanalyse.
21. mai 2024
Arbeidet til Talagrand har gitt meir kunnskap om den matematiske teorien knytt til tilfeldige fenomen som vi er omgitt av, slik som vêrprognosar og store språkmodellar.
Michel Talagrand ved Centre national de la recherche scientifique (CNRS) i Paris, Frankrike, fekk Abelprisen av Kronprins Haakon under ein høgtideleg seremoni i Universitetets Aula i Oslo i ettermiddag.
Abelprisen er ein internasjonal matematikkpris oppretta for å heidre det norske matematiske geniet, Niels Henrik Abel (1802-1829). Abel sette varige spor i den matematiske verda. Matematikken hans har vore grunnleggande for ei rekke teknologiske gjennombrot, mellom anna for internettet sin framvekst.
Abelprisen blir finansiert av den norske staten og delt ut av Det Norske Videnskaps-Akademi.
Abelprisen 2024
