Deltok i skuleundervisning om KI og kjeldekritikk
Den Høgvørde Kronprinsen besøkte Eidsvoll vidaregåande skule. Saman med skuleelevar deltok han i eit undervisningsopplegg om kunstig intelligens og kjeldekritikk.
4. november 2025
Undervisningsopplegget vart halde i regi av Store norske leksikon. Timen saman med elevane frå tredje trinn ved Eidsvoll vidaregåande skule hadde fokus på korleis kunstig intelligens utfordrar korleis vi forheld oss til kunnskap og læring.
Elevane fekk først ei innføring ved redaktør i Store norske leksikon Kjell-Olav Hovde og sjefredaktør Erik Bolstad. Deretter vart klassen delt opp i grupper, som saman diskuterte ulike moglegheiter og utfordringar knytte til kunstig intelligens.
Fekk omvising på skulen
I forkant av undervisningstimen med Store norske leksikon fekk Kronprinsen ei omvising ved Eidsvoll vidaregåande skule. Skulen har 720 elevplassar og tilbyr opplæring i sju programområde i tillegg til alternativ opplæring.
Kronprinsen møtte elevar frå mellom anna helse- og omsorgsfag, tømrar- og murarfaget.
