Dronning Sonja besøkte Sarpsborg
Sarpsborg er den einaste byen som er grunnlagd av Olav den heilage, og vertskommune for jubileumsstafetten i 2026. Hennar Majestet Dronninga besøkte i dag Sarpsborg hovudbibliotek i samband med Nasjonaljubileet 2030 og årets jubileumsstafett.
12. juni 2026
Jubileumsstafetten starta allereie i 2021 og er ei opplading til Nasjonaljubileet 2030. Jubileet markerer at det i 2030 er 1000 år sidan slaget på Stiklestad. Her døydde vikingkongen Olav Haraldsson, seinare kjend som Olav den heilage. 1030 vart ein milepæl for riksdanninga og kristninga av landet, framveksten av Noreg slik vi kjenner det.
Under besøket på Sarpsborg hovudbibliotek fekk Dronning Sonja sjå korleis jubileumsstafetten 2026 engasjerer barn og unge i Sarpsborg. Grunnskuleelevane i kommunen har arbeidd med eit prosjekt rundt tematikken «Slekt og samfunn», som er årets tema.
Leiar for den nasjonale jubileumskomiteen, stortingspresident Masud Gharahkhani, og plenumsleiar frå Sametinget, Sandra Márjá West, presenterte den nye profilen for Nasjonaljubileet 2030. Stortingspresidenten viste til at vi i logoen finn element frå riksvåpenet, kongekrona og den blå kongekappa – og understreka vidare:
– Den symbolske veven er teken inn som eit uttrykk for at Noreg er vove saman av mange ulike historier. Nasjonaljubileet sitt hårete mål er å invitere heile landet til ein stor samtale om kva Noreg har vore, kva Noreg er, og kva framtidas Noreg kan og bør vere, sa stortingspresident Masud Gharahkhani.
Plenumsleiaren frå Sametinget viste òg til at logoen også har tekst på dei samiske språka og språket til dei fem nasjonale minoritetane vi har i Noreg – kvener/norskfinnar, jødar, skogfinnar, romar og romanifolk/tatarar.
Hedda Gutubakken presenterte prosjektet «Når vi tek ordet!», og Trine Roppestad Nes imponerte med ein eigenkomponert monolog frå framsyninga, som er Sarpsborg sitt bidrag til Nasjonaljubileet si satsing «Ungdommens Hærpil», laga i samarbeid med Diorama Musikalteater.
Dronninga fekk òg sjå Olavsflammen som står utstilt på biblioteket, og møte elevrådsleiarar som har bidrege til å skrive verdibrev som blir stilte ut saman med Olavsflammen.