Dronninga på Tekstilsymposium i Skien

Hennar Majestet Dronning Sonja møtte unge og vaksne som brenn for tradisjonshandverk på Norges Husflidslag sitt Tekstilsymposium i helga.

14. oktober 2024

Dronninga i samtale med museumsdirektør Barbara de Haan ved utstillinga Vest-Agder-tepper. Foto: Liv Anette Luane, Det kongelege hoffet

Norges Husflidslag inviterte til kurs og føredrag, i tillegg til stort husflidsmarknad, utstillingar, workshops og aktivitetar for unge.

Dronninga er Norges Husflidslag sin høge beskyttar og var til stades på opninga av symposiet på museumsbygget VEV i Brekkeparken fredag, og på det faglege programmet i Ibsenhuset laurdag.

Der møtte ho òg representantar for Ung Husflid som demonstrerte arbeid med brikkevev, saum av flosskant og spinning på rokk.

Synnøve Semb (16) frå Skien viste Dronninga korleis ho brukar ein rokk til å spinne garn. Ho viste òg fram ei kufte ho har laga heilt sjølv – heile prosessen frå å klippe sauen til ferdigstrikka jakke. Foto: Liv Anette Luane, Det kongelege hoffet

Tekstilsymposium 2024 hadde Raudlista som gjennomgåande tema, det vil seie gøymd og nesten gløymd husflidskunnskap.