Dronninga sine inntrykk frå Noreg

Dronning Sonja har gjennom mange år utforska Noreg på kryss og tvers, til fots og på ski og til alle årstider. Ho er òg ein ivrig fotograf. I kveld delte ho nokre av opplevingane sine.

Reisa gjekk frå Lillehammer og Oslo, via Finse og Hardanger, til Lofoten. Dronninga viste fram landet gjennom alle fire årstider og i både godt og mindre godt vêr for reiselivsrepresentantar frå ti ulike land.

Innovasjon Noreg stod bak arrangementet i Nobels Fredssenter, der også årets Reiselivspris vart delt ut.

Reiselivsprisen 2012

Kvart år kårar Innovasjon Noreg årets reiselivsbedrift. Reiselivsprisen går til den bedrifta som har introdusert ei ny og innovativ reiselivsoppleving eller vidareutvikla ei eksisterande. Opplevinga skal ha ein positiv innverknad på Noreg som reisemål.

Dei nominerte i år var

• Høgt og lågt aktivitetspark AS, som tilbyr apparat i tre og løyper med ulik vanskegrad. Alle aktivitetane er tilrettelagde på ein berekraftig måte, slik at dei ikkje øydelegg eller gjer skade på omgjevnadene
• XXLofoten AS, som organiserer små og store events, kongressar og konferansar, opplevingar og nesten alle former for utandørsaktivitetar i Lofoten
• Skistar Norge AS, som gjennom skiferieopplevingane sine har sørgd for at Trysil og Hemsedal er sterke internasjonale alpindestinasjonar

Etter ein videopresentasjon av dei tre nominerte annonserte Innovasjon Noreg vinnaren, og Dronning Sonja kunne gratulere XXLofoten som Årets reiselivsbedrift.