Fantastisk avslutning
Det vart ei fantastisk avslutning på eit flott VM i skiskyting i dag. Hans Majestet Kongen og Prinsesse Astrid, fru Ferner har følgt meisterskapet tett.
13. mars 2016
Kong Harald og Prinsessa har teke imot vinnarane på Kongetribunen. I dag stemte endeleg alt for Johannes Thingnes Bø. Etter tre fjerdeplassar vart det full klaff og individuelt gull på den siste distansen i VM. Men det var enda kjekkare å vinne stafettgull saman med dei andre, meinte Thingnes Bø sjølv. Kong Harald spurde kva han trudde om Ole Einar Bjørndalen – vil han halde fram etter dette VM-et? Det trudde dei begge han ville.
Ole Einar Bjørndalen sjølv ville ikkje gje noko svar på dette i dag. Han vil fullføre årets sesong før han tek avgjerda. Han karakteriserte sine eigne resultat i Holmenkollen som "over all forventning". Han er 42 år – og går ut av meisterskapet med to sølv og ein bronse, i tillegg til gull på stafetten.
Stort fransk meisterskap
Trass i fire norske gull: Frankrike vart den mestvinnande nasjonen i VM. Martin Fourcade og Marie Dorin Habert tok høvesvis tre og to individuelle gullmedaljar i tillegg til gull i mixed stafett. Tysklands Laura Dahlmeier gjorde òg eit sterkt VM, med gull på kvinnenes jaktstart i tillegg til både sølv- og bronsemedaljar.
Takka dei frivillige
Omlag 1400 frivillige har vore i sving under VM. Både leiaren for arrangementet, Per Bergerud, og ordførar Marianne Borgen framheva innsatsen deira spesielt etter avslutninga dag. Den store innsatsen deira er ein føresetnad for gjennomføringa.
VM i skiskyting
