Heidra for den norske innsatsen under Special Olympics
Den Høgvørde Kronprins Haakon og Den Høgvørde Kronprinsesse Mette-Marit var til stades då regjeringa gjorde stas på den norske troppen frå Special Olympics World Games i Berlin i sommar.
23. november 2023
Dei norske utøvarane gjorde ein imponerande innsats i Tyskland og kom heim med heile 51 medaljar – 16 gull, 22 sølv og 13 bronsemedaljar.
På vegner av regjeringa inviterte kultur- og likestillingsminister Lubna Jaffery til ei mottaking i regjeringa sitt representasjonsanlegg i Oslo for å markere den norske innsatsen i Special Olympics World Games i Berlin.
Kring 40 utøvarar deltok i markeringa i går kveld. Kultur- og likestillingsministeren var full av lovord om dei norske utøvarane og heldt ei helsing saman med idrettspresident Zaineb Al-Samarai.
Kronprinsparet fekk høve til å snakke med utøvarane og høyre om deira opplevingar frå Tyskland. Noreg var representert i handball, turn, rytmisk gymnastikk, bowling, riding, friidrett, judo, symjing, golf og badminton.
