Høgtidsgudsteneste i Holmenkollen
Første juledag var Kongeparet til stades på høgtidsgudsteneste i Holmenkollen kapell etter å ha feira jul på Kongsseteren.
25. desember 2025
Sokneprest Paul Erik Wirgenes og liturg Einar Martinius P. Hammershaug tok imot Hans Majestet Kongen og Hennar Majestet Dronninga då dei kom til Holmenkollen kapell.
«Å kom nå med lovsang» var inngangssalmen for dagen. Evangeliet for juledagen om Gud som vart menneske var utgangspunktet for preika, frå Johannesevangeliet, kapittel 1, vers 1–14. «I opphavet var Ordet. Ordet var hos Gud, og Ordet var Gud.»
Gudstenesta vart avslutta med «Deilig er jorden» før soknepresten lyste velsigninga over kyrkjelyden.
Holmenkollen kapell er ein del av Ris sokn og ligg ikkje langt frå Kongsseteren, der Kongeparet ofte feirar jul. Kapellet vart opphavleg bygt i 1903, men vart øydelagt av brann i 1992. Eit nytt kapell stod ferdig i 1996.
