Jon Fosse i audiens
Hans Majestet Kongen tok imot forfattaren Jon Fosse i audiens på Slottet i dag. Fosse vart tildelt storkors av Den Kongelege Norske St. Olavs Orden 7. juni.
20. september 2024
Audiensen fann stad på kontoret til Kong Harald, som ein samtale mellom Kongen og forfattaren. Jon Fosse vart utnemnd til kommandør av St. Olavs Orden allereie i 2005, men forfremja til storkors for sitt framifrå forfattarskap.
St. Olavs Orden vert tildelt som "belønning for framifrå fortenester for Noreg og menneskeheita", og storkorset er ordenens høgaste klasse.
Reisevegen var kort for forfattaren i dag. Jon Fosse bur til dagleg i "Grotten" – staten sin æresbustad for kunstnarar og næraste nabo til Slottet.
I oktober 2023 kunne Kongen gratulere Jon Fosse med Nobelprisen i litteratur. Fosse er den fjerde norske forfattaren som har fått denne store æra, etter Bjørnstjerne Bjørnson (1903), Knut Hamsun (1920) og Sigrid Undset (1928).
Jon Fosse i audiens
