Kronprinsen på NOR-Shipping
Berekraftig skipsfart og korleis skipsfarten kan bidra til det grøne skiftet var tema under opninga av verdas største shippingkonferanse, Nor-Shipping på Lillestrøm.
6. juni 2023
Den Høgvørde Kronprins Haakon var til stades under konferansen, som vart opna av klima- og miljøminister Espen Barth Eide.
Nor-Shipping blir arrangert kvart andre år og tiltrekkjer seg shippingleiarar frå heile verda. I løpet av dagane konferansen varer, kjem det i stand ei rekkje møte som verkar inn på framtidig berekraftig sjøtransport.
«Det store bildet» var temaet for føredraget til Joseph Stiglitz, som vart tildelt nobelprisen i økonomi i 2001. Etter innlegget deltok Stiglitz i ein paneldebatt saman med konsernsjef i DNB Kjerstin Braathen og administrerande direktør i DNV Remi Eriksen under temaet "Energiomstilling – en maritim mulighet?".
Kronprinsen var òg til stades ved debatten «Aktivering av det maritime vendepunkt», før han fekk ei omvising i utstillingshallane, der ei lang rekkje norske og utanlandske aktørar har stands under Nor-Shipping.
Besøk i konferansehallen
Under omvisinga gjorde Kronprinsen fleire stopp der han møtte aktørar som jobbar med spennande prosjekt for ei berekraftig og sirkulær shippingframtid, blant anna Jotun, DNV og Norske Maritime Eksportører.
