Kronprinsessa på korøving

I den travle førjulstida stod naturleg nok ei rekkje av dei kjende og kjære julesongane våre på øvingsrepertoaret under besøket til Kronprinsessa.

Kronprinsesse Mette-Marit vart motteken av kunstnarisk leiar Anne Karin Sundal-Ask og dei tillitsvalde i jentekoret Karoline Heyerdahl (15) og Rebecka Waldum (18). Da Kronprinsessa kom inn i øvingslokalet, vart ho møtt med song frå koret, som var i full gang med øvingane. Styreleiar Hege Eikens Randen ønskte Kronprinsessa velkommen, mens kunstnarisk leiar Sundal-Ask orienterte om det kunstnariske. Kronprinsessa brukte god tid på å prate med jentene om korleis det er å syngje i koret.

Julekonsertar

Førjulstida er hektisk for kor over heile landet – så òg for Det Norske Jentekor, som dei kommande vekene har eit tett program med julekonsertar. Søndag 12. desember held Det Norske Jentekor to julekonsertar i Dronning Sonja KunstStall.

NRKs jentekor

Det Norske Jentekor er ein korskule for talentfulle songarar og består av fire kor – rekruttgruppa, aspirantkoret, hovudkoret og Studiokoret. Dei vel 110 songarane er i alderen 6–26 år og kjem inn etter opptaksprøve. Koret vart oppretta som NRKs pikekor av Marie Foss i 1947 og har sidan etablert stolte tradisjonar og eit høgt kunstnarisk nivå. Med ein kunstnarisk profil som er både nyskapande og tradisjonell, har Det Norske Jentekor ei målsetjing om å skape sterke uttrykk som treffer publikum så vel som songarar.

Det Norske Jentekor er ein engasjert og aktuell kulturaktør som bestiller ny musikk og utviklar den tradisjonelle kulturarven vidare. Utdanninga som blir gjeven til dei talentfulle jentene våre, er unik, med ein kombinasjon av undervisning i musikkteori, ensemblesong, dirigering og individuelle songtimar, og dessutan konsertar og turnear i inn- og utland. Ambisjonane til koret er å vere heile Noregs jentekor. Det Norske Jentekor er ei sjølvstendig vidareføring av NRKs pikekor, etter at koret forlét institusjonen i 1994.

Marie Foss

NRKs pikekor vart starta av Marie Foss, som var kordirigent og musikkpedagog. Koret vart starta for bruk i den populære «Barnetimen» i radioen på laurdagar, men koret fekk etter kvart mykje å seie for fleire delar av programtilbodet i NRK. I 1972 starta Marie Foss Studiokoret som ei vidareføring for eldre jentekorsongarar. Ei rekkje kjende songarar og musikarar, som Elizabeth Nordberg Schultz, Lilleba Lund Kvandal, Randi Eckhoff, Elin Rosseland, Hege Schøyen, Tone Ringen, Iselin Alme, Anita Skorgan og Ingeborg Dalheim, har bakgrunn frå Det Norske Jentekor.