Kvinner i leiinga lønner seg
Den Høgvørde Kronprinsesse Mette-Marit var til stades på ein internasjonal konferanse om kvinneleg leiarskap og dei globale berekraftmåla i dag.
27. november 2017
Auka likestilling og fleire kvinner inn i leiande stillingar – i næringslivet, i politikken – er heilt avgjerande for å nå FN-måla om å utrydde all fattigdom.
Over 100 deltok i konferansen i regi av Care, Norfund og Næringslivets Hovedorganisasjon.
Høgare omsetning
Utanriksminister Ine Eriksen Søreide og investeringsdirektør Robert Næss i Nordea Investment Management heldt kvar sitt innlegg der dei viste til at bedrifter med større mangfald og kvinner i leiinga har høgare omsetning.
Men det er framleis ein lang veg å gå. 96 prosent av dei 11 000 største selskapa i verda har ein mann både som administrerande direktør og som styreleiar, viser ei undersøking utført av Nordea Investment Management i 2017. Berre 0,5 prosent av dei største selskapa har kvinneleg direktør og kvinneleg styreleiar.
Etterlyste rollemodellar
Terri McCullough, tidlegare direktør for «No Ceilings: The Full Participation Project», peika på to område der det var viktig med kvinnelege rollemodellar og fleire kvinnelege leiarar: innanfor politikken med utforminga av lover og reglar – og som rådgjevarar og mentorar for kvarandre.
– You can’t be what you can’t see, slo Terri McCullogh fast.
CARE-konferansen New Connections
