Markerte 50 år med havbruk

«Vi va to toillinga på Hitra som treft spikarn på hauet.» Dette skal Sivert Grøntvedt ha sagt om bror sin Ove og seg sjølv og det som 28. mai 1970 vart starten på oppdrett av laks, i dag ei av Noregs største næringar.

Saman med blant andre Sjømat Norge og Nærings- og fiskeridepartementet inviterte fredag Hitra kommune til markering av det dei har valt å kalle «Nasjonalt havbruksjubileum 50+1 år». Jubileet, som eigentleg skulle ha vore markert i fjor, har i år vorte ei digital sending frå Hitrahallen.

«Dagen er òg eit fint høve til å sjå framover. Eg har derfor også lyst til å takke alle dei som vel å jobbe med og leve av havet. Deira kunnskap, samarbeid, engasjement og innovasjon for et sunt hav er med på å sikre det blå gullet for framtidige generasjonar», sa Kronprins Haakon da han opna sendinga med ei videohelsing.

Kronprinsen fokuserte òg i talen sin på pionerane som for 50 år sidan satsa hus og heim på å skape ei ny og viktig næring for Distrikts-Noreg. Dei vart òg vigde mykje merksemd under arrangementet, som vart strøymt ut til bedrifter og kommunar langs heile kysten.