Markerte den norske innsatsen i Pyeongchang

Kulturministeren har, på vegner av regjeringa, ein tradisjon for å arrangere ei mottaking for å markere den norske innsatsen i olympiske og paralympiske leikar, vinter som sommar.

Og i år vart det ekstra folksamt i representasjonsbustaden til regjeringa i Parkvegen 45 med ikkje mindre enn 21 medaljevinnarar frå Pyeongchang til stades.

Heidra utøvarar

Jesper Saltvik Pedersen tok Noregs første gull under Paralympics i Sør-Korea. I går fekk den 18 år gamle alpinisten regjeringas paralympiske ærespris som blir delt ut for framståande prestasjonar av ein norsk deltakar i dei paralympiske leikane.

«Jesper Saltvik Pedersen fra Karmøy er en fremragende representant for norsk idrett. Han har i årets leker levert store prestasjoner. Juryen viser til at Saltvik Pedersen har vist stor fremgang i sin idrett og har utmerket seg med sin evne til å motivere og inspirere både seg selv og andre. Årets vinner utmerker seg også med sin treningsvilje og engasjement for sin idrett. I sitt første Paralympics sikret han seg både gull og bronse i paraalpint,» heiter det i grunngjevinga frå juryen.

Idrettsforbundet delte ut Fearnleys olympiske ærespris til skeiserennaren Håvard Holmefjord Lorentzen og skihopparen Maren Lundby.

Følgde vinterleikane i Pyeongchang

Prinsesse Märtha Louise var sjølv i Pyeongchang under dei paralympiske vinterleikane.

Den Høgvørde Kronprins Haakon følgde dei norske utøvarane under OL i vinter, der han fekk sjå ei rekkje gode norske prestasjonar. 15. februar vart ein norsk jubeldag i Sør-Korea med tre gull, to sølv og ein bronse – den beste norske OL-dagen gjennom tidene.