Markerte frigjeringsjubileet i London
Deira Majestetar Kong Harald og Dronning Sonja var til stades under ei markering av frigjeringsjubileet i Sjømannskyrkja i London.
16. november 2025
I år er det 80 år sidan frigjeringa av Noreg. Dette vart òg markert ved Sjømannskyrkja i London, med Kongeparet til stades.
Markeringa starta med kransnedlegging ved dei tre minnesmerka som er plasserte på St. Olavs Square. Ambassadør Tore Hattrem la ned ein krans ved Kong Haakon-statua som står utanfor kyrkja. Det vart òg lagt ned krans ved minnesmerket over norske falne i første verdskrigen og ved minnesmerket over falne frå andre verdskrigen.
Festgudsteneste
Kongeparet deltok òg i ei festgudsteneste i kyrkja, leidd av biskop i Bjørgvin Ragnhild Jepsen og sjømannsprest Geir Øy. Sjømannskyrkja står under teologisk tilsyn av biskopen i Bjørgvin og vart stifta i Bergen i 1864. I dag er det 28 sjømannskyrkjer verda rundt.
Sjømannskyrkja i London sitt eige kor – Olavskoret – og eit barnekor framførte fleire songar under gudstenesta.
Under kyrkjekaffien møtte Kongeparet fleire av dei som brukar Sjømannskyrkja i London i kvardagen. I over 150 år har Sjømannskyrkja servert vaflar til nordmenn i utlandet, og det vart sjølvsagt servert vaflar laga etter oppskrifta til kyrkjelyden i London.
Opning av nybygg
Våren 2025 vart eit tilbygg til Sjømannskyrkja ferdigstilt. Nybygget inneheld leilegheiter til stab og utleige, samt eit leir- og konferansesenter for norske grupper. Etter gudstenesta opna Kongen den nye delen ved å avduke ein plakett.
Sjømannskyrkja er ein sjølvstendig og frivillig organisasjon som møter nordmenn i utlandet. Dei har brei erfaring innan beredskap når kriser eller ulykker rammar, og skapar sosiale, kulturelle og kyrkjelege møtestader der folk er, på alle kontinent og på norsk kontinentalsokkel.
Hans Majestet Kongen er organisasjonen sin høge beskyttar, slik også far hans, Kong Olav, og farfar hans, Kong Haakon, var.
Viktig samlingsstad under krigsåra
Under andre verdskrig vart ei norsk eksilregjering etablert i London. Derfrå leia og koordinerte eksilregjeringa den norske motstanden dei neste fem åra. Kong Haakon vart eit viktig, samlande symbol for motstandskampen og eit fritt Noreg. Kongen sine talar over radio frå London bidrog til å halde mot og motstandsvilje oppe.
Sjømannskyrkja i London vart òg ein viktig samlingsstad for nordmenn under krigsåra.
Sjømannskyrkja i London
