Møtte Sykehusklovnene
Sykehusklovnene arbeider for at barn skal oppleve glede og meistring i krevjande situasjonar på sjukehus i heile Noreg. Den Høgvørde Kronprinsessa møtte sjukehusklovnar, helsepersonell, barn og familiane deira på Ullevål sjukehus.
5. mars 2025
Sykehusklovnene er ein ideell stiftelse med 50 profesjonelle sjukehusklovnar, ein administrasjon og eit styre. Målet er å møte barn og unge som er innlagde på sjukehus eller får behandling heime, og å skape augeblink av glede, meistring og livsgneiste.
Alle sjukehusklovnane har gjennomgått ei opplæring på halvanna år for å kunne utøve den improviserte kunstforma til glede for barna. Gjennom leik og humor gir dei barn og unge ein etterlengta pustepause i ein krevjande kvardag.
Kronprinsessa blei teken imot av avdelingsleiar ved barnemedisinsk avdeling, Siril Kleiven, på Ullevål sjukehus, og spesialrådgjevar Anders Bayer.
I foajeen blei ho møtt av dei to sjukehusklovnane Bella Bing Bong (Hedda Munthe) og Cocodrilo (Arturo Tovar), dagleg leiar i Sykehusklovnene, Ellen Arnstad, og kunstnarisk leiar i Sykehusklovnene, Kjersti Skjaker.
Besøket blei innleidd med ei orientering frå Ullevål sjukehus og Sykehusklovnene. Dagleg leiar for Sykehusklovnene, Ellen Arnstad, fortalde om organisasjonen, og Sykehusklovnene, representerte ved skodespelarane Hedda Munthe og Arturo Tovar, fortalde om arbeidet sitt og kvardagen i møte med barn, unge og pårørande.
Sykehusklovnene starta på Ullevål sjukehus i 2001. I dag arbeider dei ved barne- og ungdomsavdelingar på 20 sjukehus i heile Noreg. I tillegg er dei på heimebesøk hos barn og unge i palliative forløp.
På barnemedisinsk sengepost fekk Kronprinsessa sjå Sykehusklovnene i arbeid. Ho fekk òg møte fleire av barna som har møtt Sykehusklovnene medan dei har vore innlagde.
Godt samarbeid
I 2024 møtte Sykehusklovnene meir enn 35 000 barn. Stiftelsen har eit godt samarbeid med sjukehusa og helsepersonell. Gjennom felles forståing av oppdraget med å hjelpe sjuke barn og pårørande skal dei skape meistringskjensle og tryggleik.
Sykehusklovnene er til stades på pasientrom, dagbehandling, poliklinikkar og medisinske avdelingar på 20 sjukehus over heile landet. Målgruppa er barn og unge frå 0–18 år, uavhengig av diagnose eller tilstand. Alle sjukehusklovnane er profesjonelle skodespelarar med spesialisering i sjukehusklovning, som har spesialisert seg på å møte barn og unge for å skape gode opplevingar.
Sykehusklovnene
