Nyttårsframsyning med Dissimilis

Framsyninga har fått namnet “Gatelangs” og er ei historie om håp, motstand og kor viktig det er å handle, sjølv når det kan kjennast som om verda står stille.

I ein fullsett sal sat Prinsesse Astrid, som har vore beskyttar for Dissimilis sidan 1995.

Framsyning om håp og mot

I ei verd prega av uro og bekymring står våre hovudpersonar overfor eit uventa dilemma. Dei kjem over ein avisartikkel som fortel at kongen ikkje lenger ser nokon grunn til å kjempe for ei betre verd – han er rett og slett utmatta.

Skal dei la verda segle sin eigen sjø, eller vel dei å stå opp for det dei trur på? For å finne svar legg dei ut på ei reise oppover Karl Johan, med eitt mål: å nå fram til slottet og overtyde kongen om at det framleis finst håp og verdiar verdt å kjempe for.

På vegen møter dei menneske som både inspirerer og utfordrar dei, og kvart møte fører dei nærare forståinga av at sjølv dei minste handlingane kan setje i gang store endringar.

Om Dissimilis

Dissimilis har i mange år skapt arenaer for meistring, kunst og livskvalitet for menneske med utviklingshemming og funksjonsnedsetjingar. Målet er å gi rom for kunst som utfordrar, rører og forvandlar – der kvar enkelt får skinne og vise sitt fulle potensial.

Dissimilis vart stifta av Kai Zahl i 1982.