Oslo-Filharmonien opna sesongen
Endeleg kan Oslo-Filharmonien spele for publikummarar igjen. Hennar Majestet Dronning Sonja var til stades under sesongopninga i Oslo Konserthus i går kveld.
20. august 2020
200 publikummarar gav ståande applaus til symfoniorkesteret og ny sjefdirigent Klaus Mäkelä (24) etter konserten.
Oslo-Filharmonien starta konserten med urframføringa av bestillingsverket «Wiegenlied» (Voggesang), skrive av den finske komponisten Sauli Zinovjev (31). Tittelen er lånt frå Johanns Brahms’ berømte song frå 1868, mykje brukt i speledåsar for barn.
– Det vil gje meg stor glede om publikum sit att med ei kjensle av håp og trøyst etter å ha høyrt dette verket, seier komponist Sauli Zinovjev i ei melding på nettsidene til symfoniorkesteret.
Kveldens hovudverk var Mahlers «Symfoni nr. 1».
Til stades i salen var òg Oslo-ordførar Marianne Borgen og styreleiar Kristin Skogen Lund i Oslo-Filharmonien.
Dronning Sonja er beskyttar for Oslo-Filharmonien, og tidlegare i sommar tok ho imot administrerande direktør Ingrid Røynesdal i audiens på Slottet.
I 2019 markerte symfoniorkesteret 100 år med jubileumskonsert i Konserthuset og bursdagskonsert på Slottsplassen.
Oslo-Filharmonien: sesongåpning
