SIKT i gang i Bodø
For niande år på rad inviterer Den Høgvørde Kronprins Haakon unge leiarar og talent til konferansen SIKT. Delar av programmet blir strøymde direkte frå Nord universitet i Bodø.
25. oktober 2021
Sendinga startar i morgon, tysdag 26. oktober, klokka 08.30. Da er det offisiell opning med talar av ordførar i Bodø kommune Ida Maria Pinnerød, rektor Hanne Solheim Hansen ved Nord universitet og Kronprins Haakon.
Etter den digitale utgåva i fjor er det Nord-Noreg og kulturbyen Bodø som er arena når SIKT-konferansen samlar nærare 200 deltakarar frå heile landet under same tak.
"Muligheter"
Frå scenen vil deltakarane blant anna høyre forsvarssjef Eirik Kristoffersen og journalist Kadafi Zaman. Kjersti Thorbjørnsrud og Marjan Nadim, begge frå Institutt for samfunnsforsking, vil òg delta i ein samtale om ytringsklimaet i Noreg. Mange av deltakarane skal sjølve på scenen og snakke under overskrifta «Muligheter» – årets tema.
Deltakarane skal òg få utfordre seg med ein workshop frå det franske universitetet INSEAD.
Konferansen startar i ettermiddag med ein tur langs Saltfjorden, besøk til Jektefartsmuseet, workshop og førelesingar i Stormenkvartalet. Konferansier i år er Lydia Gieselmann.
Deltakarane kjem frå heile landet og representerer næringsliv, gründerar, offentleg sektor, organisasjonsliv, kultur, idrett, media og akademia. Formålet med konferansen er å skape ein møteplass der deltakarane skal kunne lære av kvarandre og diskutere felles utfordringar og moglegheiter i Noreg i framtida.
Kom til Bodø med tog
Kronprinsen og ei rekkje av deltakarane kom til Bodø i dag tidleg med tog.
I forkant av konferansen møtte Kronprinsen 50 unge frå Nord-Noreg som er med i «Unge stemmer», eit kompetanseprogram i regi av SpareBank1 Nord-Norge.
Han deltok òg på ein lunsj med regionalt næringsliv om unge og moglegheiter i Nord-Noreg.
SIKT 2021
