Ski-VM i Trondheim

Representantar for Kongehuset var til stades under heile meisterskapet og kunne gratulere nye verdsmeistrar i langrenn, kombinert og hopp.

Team Pølsa

Det var mange skiheltar i aksjon under VM i nordiske grenar, men fredag 28. februar var det nokre heilt spesielle heltar som tok plass i langrennsløypene i Granåsen. Til jubel frå 9000 skuleelevar på tribunene gjekk gjengen frå «Team Pølsa» eit imponerande løp i VM-anlegget.

Etter løpet vart dei seks ungdommane med ulike funksjonsnedsetjingar tekne imot av Hennar Majestet Dronninga og Kronprinsparet på kongetribunen, slik alle vinnarane vart under ski-VM i Trondheim.

Historisk VM-dag

Onsdag 5. mars var ein historisk dag i Granåsen i Trondheim. For første gong stod paralangrenn på VM-programmet. Frå tribunen heia Kongeparet og Den Høgvørde Kronprinsen.

Det vart kåra vinnarar for kvinner og menn i dei tre klassane ståande, sitjande og synshemma. Høgast var kanskje jubelbrølet i Granåsen då Vilde Nilsen frå Noreg gjekk inn til gull i klassen sin.

Noreg beste nasjon

Noreg vart beste VM-nasjon med 13 gull, 11 sølv og 8 bronse. Det vart òg mykje å juble for sett med svenske auge. Sverige tok elleve medaljar, der seks var gull – til glede for dei svenske gjestene på tribunene.

Johannes Høsflot Klæbo vart den første i historia til å vinne seks gull av seks moglege i eit ski-VM.

Ski-VM i Trondheim for andre gong

Kronprins Haakon har vore ein del av hovudkomiteen for VM i Trondheim, etter invitasjon frå Noregs Skiforbund, og har følgt planlegginga tett.

Han deltok òg på ulike aktivitetar under meisterskapet. Kronprinsen vart med løypepatruljen ut på oppdrag, fekk vere med å køyre løypemaskin og besøkje avfallssorteringa i Granåsen – ein viktig del av arbeidet med å gjere VM meir berekraftig.

Trondheim arrangerte for andre gong VM i nordiske greiner. Første gong var i 1997.