Symfonisk opning av festspela
Dei 73. Festspela i Bergen er i gang. Hennar Majestet Dronning Sonja var til stades under det tradisjonsrike gratisarrangementet på Torgallmenningen, som markerte startskotet for 15 dagar med opplevingar innan musikk, teater, dans og mykje meir.
21. mai 2025
På scena i Bergen sentrum, framfor eit par tusen tilskodarar og med sol frå skyfri himmel, stod Bergen Filharmoniske Orkester under leiing av dirigent Grete Pedersen.
Publikum fekk høyre musikk av Grieg, Stravinskij, Schubert og Beethoven, og dei fekk ta del i allsong med «Nystemten» og «Ja, vi elsker». Kultur- og likestillingsminister Lubna Jaffery og ordførar i Bergen, Marit Warncke, heldt talar.
Før opningsseremonien på Torgallmenningen vart Dronninga møtt av lystig korpsmusikk i regi av Norges Musikkforbund. Midtun Skoles Musikkorps og Samnanger Skulemusikklag spelte mellom anna «Seterslått» og «Kongolela» av Jan Magne Førde og «September» av Maurice White.
Dronning Sonja var òg til stades under ein lunsj i Håkonshallen i høve festspela, der Bergen kommune og ordføraren var vertskap.
I kveld er Dronning Sonja til stades ved opningsframsyninga i Grieghallen – William Kentridge si «The Great Yes, The Great No». I morgon er det opning av Festspelutstillinga 2025 i Bergen Kunsthall. Tori Wrånes er årets festspelkunstnar.
Kong Harald er beskyttar for Festspela i Bergen.
Festspillene i Bergen 2025
