VM i Freestyle
Verdsmeisterskapen i Freestyle er i full gang. H.K.H. Kronprins Haakon har følgt øvingane i Oslo og på Voss dei siste dagane. Kronprinsen har òg engasjert seg i rekrutteringa av frivillige til meisterskapen.
Kronprins Haakon er til stades på tre av dei seks finaledagane under VM. Måndag 5. mars var han i Wyllerløypa i Oslo, der finalen i halfpipe gjekk av stabelen. Kronprinsen delte ut medaljane til dei tre beste i herre- og dameklassen.
Hopp og kulekøyring på Voss
I går var Kronprinsen til stades under finalen i kulekøyring i Myrkdalen på Voss. Her fekk han kunnig coaching undervegs i konkurransen av tidlegare OL-vinnar i freestyle og vossing Kari Traa. Kronprinsen delte ut medaljane i kulekøyring og møtte glade frivillige under arrangementet.
I ettermiddag held Kronprinsen fram VM-programmet sitt med finalen i aerials (hopp). Ein annan vossing, fleire gonger noregsmeister i kulekøyring Hans Eide, vil gi Kronprinsen ekspertvurderingane sine undervegs.
Frivillig arbeid
Det ligg mykje frivillig innsats bak store idrettsarrangement som dette. Kronprinsen er oppteken av frivillig arbeid og har engasjert seg i dette også under VM i freestyle. Kronprins Haakon har helst på mange av dei frivillige i Oslo og på Voss og har òg bidrege i rekrutteringa i form av foredrag for frivillige i idrettsklubben Heming i Oslo 13. februar.
VM på Voss og i Oslo
Freestyle-VM på Voss og i Oslo omfattar 12 konkurransar i tida 2. til 10. mars 2013. Om lag 350 deltakarar på internasjonalt toppnivå frå 35–40 nasjonar deltek.
Halfpipe vart avvikla i Wyllerløypa i Oslo, mens konkurransane i kulekøyring, parallellkulekøyring, skicross, aerials (hopp) og slopestyle går i eit krevjande anlegg i Myrkdalen i Voss kommune, der det er investert flere millionar kroner i eit topp moderne anlegg.
Aktuelle saker
50 år med Framtiden i våre hender
Hans Kongelige Høyhet Kronprins Haakon var til stede under en rapportlansering i anledning organisasjonen Framtiden i våre henders jubileum.
Utnevnelse til St. Olavs Orden
Hans Majestet Kongen har utnevnt lege, programleder og artist Trond-Viggo Torgersen, Bergen, til Kommandør av Den Kongelige Norske St. Olavs Orden.