Beredskap i vinterfjellet
Dei Høgvørde Kongelege Kronprinsregenten og Kronprinsessa besøkte denne veka Finsekurset i regi av Raudekrossen, og fekk eit innblikk i kurs i søk- og redningsaksjonar under krevjande forhold i vinterfjellet.
Finsekurset er eitt av dei viktigaste kursa for utdanning av aksjonsleiarar for søk- og redningsaksjonar i Noreg på vinterstid, og samlar 25 deltakarar frå Raudekrossen, Hovudredningssentralen, Politiet, Brann- og redningsetatane og Sivilforsvaret.
Kronprinsparet besøkte Finsekurset i regi av Raudekrossen Hjelpekorpset og møtte deltakarar, kursleiarar og frivillige som deltek i øvinga. Foto: Cornelius Poppe / NTB
Hovudmålet med kurset er å gjere deltakarane betre rusta til å leie leiteaksjonar under krevjande vinterforhold, og strekkjer seg over ei veke.
Natur og klima på Finse i februar og mars sikrar realistiske og utfordrande forhold for kursdeltakarane.
Deltok i øvingar
Under Kronprinsparet sitt besøk, som gjekk over to dagar, fekk dei mellom anna ei grundig innføring i dei årlege kursa Raudekrossen Hjelpekorpset arrangerer på Finse – gjennom orienteringar og samtalar inne på Finsehytta, og under observasjon ute i øvingsområdet.
Kronprins Haakon og Kronprinsesse Mette-Marit fekk også sjølve ta del i ulike øvingsmoment saman med kursleiarar, deltakarar og frivillige under besøket. Mellom anna var dei med på øvingar i felt med fokus på livreddande søk i skred – og søk etter skredtatt med elektronisk sendar og mottakar.
Kronprinsparet både observerte og deltok aktivt i øvingane under besøket til Finse. Foto: Cornelius Poppe / NTB
Lang tradisjon for kursing i vinterfjellet
Raudekrossen sine kurs på Finse har tradisjonar tilbake til 1959. Sjølv om kurset føregår i same klima og i røffe omgjevnader, slik det har gjort i alle desse åra, har metodar, utstyr og kompetanse endra seg i takt med tida.
Det blir gjennomført to ulike kurs på Finse i regi av Raudekrossen Hjelpekorpset i år. Det andre kurset er «Lagleiing søk og redning». Her er alle deltakarane frå Raudekrossen – og hovudmålet med dette kurset er å utdanne lagleiarar som skal leie leiteaksjonar uavhengig av årstid og omgjevnader.
Raudekrossen sitt kurs finn stad på Finse - der natur og klima sikrar realistiske og krevjande forhold for øvingar i vinterfjellet. Kronprinsparet deltok i fleire av øvingane torsdag, mellom anna køyrde dei scooter med eit lag med snøre-køyrarar bak på veg ut til øvinga. Foto: Cornelius Poppe / NTB
Aktuelle saker
Markerte frigjerings- og veterandagen
8. mai vart frigjeringsdagen og den nasjonale veterandagen markert over heile landet. Den Høgvørde Kronprinsen deltok i markeringa på Akershus festning i Oslo.
Statsbesøk fra Moldova
Moldovas president, Hennes Eksellense fr. Maia Sandu innledet mandag sitt statsbesøk til Norge. Hans Majestet Kongen og Hennes Majestet Dronningen er vertskap for besøket, og presidenten ble ønsket velkommen med en høytidelig seremoni på Slottsplassen.