Fylkestur i Vestland
Hans Majestet Kong Harald starta den tre dagar lange fylkesturen i Etne, heilt sør i Vestland fylke. Kommunen har ein viktig plass i historia vår, og på programmet stod eit utdrag frå sogespelet om kongen frå Etne og far hans, Erling Skakke.
25. mai 2026
Stødle kyrkje skapte dei perfekte kulissane for sogespelet – ei kyrkje Erling Skakke lét byggje på 1100-talet. Kyrkja er bygd på og restaurert fleire gonger.
Erling Skakkes rike
Stormannen Erling Skakke var far til barnekongen Magnus 5. Erlingsson, som vart krona i Bergen sju år gammal. Med kroninga følgde også ei ny tronfølgjelov som skulle sikre samling om éin konge, basert på slektskap og blodsband. Medan sonen var mindreårig, var Erling den reelle riksstyraren i Noreg.
Det historiske dramaet av Johannes Heggland skildrar den turbulente maktkampen på 1100-talet mellom Erling Skakke og sonen hans, kong Magnus Erlingsson.
Turen gjekk vidare til aktivitetsparken ved Skakke kulturhus og Enge ungdomsskule, som har fått det treffande namnet Skakkeringen. Over 1000 etnebuar vart samla.
– Eg har berre vore her ein liten time, men vassar så å seie allereie til knes i historie, sa Kong Harald i talen sin i Skakkeringen.
Kongen framheva Etnes rike kulturhistorie, den vakre naturen, det sterke lokalsamfunnet med dugnadsånd og fotballcup. I over 40 år har samfunnet på drygt 4000 innbyggjarar klart å samle 2000 til fotballcup.
– Historia er éin ting. Det er både viktig og bra at de veit å ta vare på historia dykkar her i Etne, og eg håpar alle barn og unge her lærer litt ekstra om henne på skulen. Men det er her og no de lever – i eit sprell levande samfunn, sa Kong Harald.
Segla inn fjorden med Kongeskipet
I Skakkeringen var det velkomsttale ved ordførar Mette Heidi Bergsvåg Ekrheim og eit kulturprogram med musikk, dans og diktlesing.
Kong Harald helsa frå Dronning Sonja og sa at ho hadde gleda seg til å kome, men dessverre måtte bli heime.
Kongen gjekk i land i Etne hamn med sjalupp frå Kongeskipet Norge, som han nyttar under fylkesturen.
I morgon går turen vidare til Samnanger og Vaksdal, medan Askvoll står for tur siste dagen. Kongen besøker fire kommunar han ikkje har vore på offisielt besøk i tidlegare.
