Oppdrag Energi

«Oppdrag Energi» peikar på sentrale nasjonale moglegheiter for vekst og utvikling mot eit framtidig lågutsleppssamfunn, skriv NHO i omtalen sin av konferansen. Tre område med gode moglegheiter for norske bedrifter vart spesielt behandla:

• Tilgangen på fornybar energi skaper industrielle moglegheiter
• Noreg kan vere ein energibank for Europa
• Noreg kan bli ein global teknologileverandør

NHOs president Heine Wang innleidde og gav ordet til blant anna statsminister Jens Stoltenberg, Maria van der Hoeven, Executive Director i International Energy Agency, Philip Lowe, generaldirektør i EU-kommisjonen, og Helge Lund, konsernsjef i Statoil. Både desse og andre innlegg er tilgjengelege på NHOs konferansesider.

NHOs administrerande direktør Kristin Skogen Lund avslutta dagen med ei oppmoding til kloke val:
– Eg trur vi også skal lære av generasjonen før oss, som tok kloke og modige val som vi lever godt av i dag. Vi må ta like kloke val i dag, slik at vi kan ha ei energinæring i Noreg som skaper verdiar og velstand, men som likevel bidreg til å løyse klimautfordringane i verda, sa Skogen Lund.
 

I kveld vil Kronprins Haakon vere til stades ved NHOs årsmiddag, også den i Operaen.