Hopp til hovedinnhold

Dronninga i Frankrike

Tre norske kunstnarar er vigde ei eiga utstilling på Frankrikes nasjonalmuseum for keramikk i Sèvres. I dag var Hennar Majestet Dronning Sonja til stades på opninga av utstillinga, som har fått namnet «Forces de la Nature» – Naturens krefter.

23.09.2018

Museet ligg utanfor Paris og er ein av verdas fremste arenaer for keramikk som kunstform.

Med norsk natur som inspirasjon

Kari Dyrdal (tekstil), Torbjørn Kvasbø (keramikk) og Margit Tingleff (keramikk) er tre sentrale norske samtidskunstnarar.

Dronninga og Frankrikes kulturminister Françoise Nyssen fekk ei omvising i utstillinga av kurator Christine Germain-Donnat. Dei tre kunstnarane var til stades og fekk presentert verka sine. På forskjellige måtar har dei vorte inspirerte av storslåtte norske landskap, noko utstillingstittelen speglar.

Opprør mot tradisjonelt kunsthandverk

Utstillinga omfattar 65 verk. Ho er ei av dei største utstillingane av norsk kunsthandverk viste utanfor Noregs grenser.

Marit Tingleff, Torbjørn Kvasbø og Kari Dyrdal er vigde ei eiga utstilling i Sèvres. Foto: EPA/YOAN VALATMarit Tingleff, Torbjørn Kvasbø og Kari Dyrdal er vigde ei eiga utstilling i Sèvres. Foto: EPA/YOAN VALAT

 

Kunstnarane har alle bakgrunn frå Kunsthøgskolen i Bergen frå midten av 1970-talet. Dei var sentrale i opprøret mot den tradisjonelle tenkinga innan kunsthandverk.

Utstillinga er ein del av arbeidet med å fremje norsk kultur i utlandet og bane veg internasjonalt for norske kunst- og kulturaktørar. Bak står Norwegian Crafts, KODE Kunstmuseum og Komponisthjem i Bergen og Sørlandets Kunstmuseum i Kristiansand. Ho blir støtta av Utanriksdepartementet og ambassaden i Paris.

Verdskjent porselen

Frankrikes nasjonalmuseum for keramikk er knytt til porselensfabrikken som vart anlagd i 1740 og flytta til Sèvres i 1756.

I morgon deltek Dronninga på markeringa av 100-årsjubileet for det norsk-franske utdanningssamarbeidet i Rouen i Normandie.

Dronninga blir motteken av Frankrikes kulturminister Françoise Nyssen. Foto: Liv Anette Luane, Det kongelege hoffetDronninga blir motteken av Frankrikes kulturminister Françoise Nyssen. Foto: Liv Anette Luane, Det kongelege hoffet

 

Del denne artikkelen på Facebook eller Twitter

Del på Twitter Del på Facebook