Hopp til hovedinnhold

Dronning Sonja Sangkonkurranse

Dronning Sonja Sangkonkurranse blir halden i Oslo annakvart år og trekkjer til seg framståande songtalent innan opera og klassisk musikk frå heile verda. Dronninga følgjer konkurransen og overrekkjer sjølv prisen til vinnarane.

Prisvinnarane oppnår eksponering, betydelege pengepremiar, viktige konsert- og operaengasjement og bistand til utvikling av karrierane sine. Dronning Sonja overrekkjer prisen og eit grafisk trykk signert av Hennar Majestet under finalekonserten til konkurransen. Prisvinnarane har oppnådd engasjement ved dei fleste av dei leiande operahusa i verda etter prestasjonane sine i Oslo.

Kontraalten Jasmin White vart vinnaren av Dronning Sonja Sangkonkurranse 2023. Foto: Per Ole Hagen / QSSC

Lise Davidsen er den siste norske vinnaren av konkurransen så langt. Ho gjekk av med sigeren i 2015. Den no verdskjende sopranen var konferansier under finalen i 2023. Foto: Per Ole Hagen / QSSC

Førebels siste finale gjekk av stabelen hausten 2023

Deltaking frå heile verda

Deltakarane i konkurransen er i hovudsak nyutdanna songarar i starten på ein karriere innanfor opera og klassisk musikk. Øvre aldersgrense er 32 år. Til kvar konkurranse kjem det inn søknader frå songarar frå heile verda. Til konkurransen i august 2023 søkte 521 songarar frå 58 ulike land om å delta.

I tillegg til første, andre og tredjepris, blir det òg delt ut pris for beste tolking av lied og dessutan Ingrid Bjoners stipend som går til beste norske deltakar.

Prisen for beste tolkning av lied gikk til Felix Gygli (baryton, Sveits). Foto: Per Ole Hagen / QSSC

Organisasjonen

Konkurransen er organisert som ei stifting og blir arrangert i samarbeid med Den Norske Opera & Ballett, NRK radio og TV, Norges Musikkhøgskole, Kunsthøgskolen i Oslo, Oslo-Filharmonien, Bergen Filharmoniske Orkester og Det kongelege hoffet.

Internasjonale partnarar er blant anna Royal Opera House Covent Garden (London), Bayerische Staatsoper (München), Staatsoper Unter den Linden (Berlin), Metropolitan Opera (New York) og Zürich Opera.

Meir om stiftingas arbeid på qssc.no

Historia

Konkurransen vart arrangert for første gong i 1988, da som ein konkurranse for pianistar. Føremålet var å skape ein internasjonal musikkarena i Noreg som kunne synleggjere unge musikkutøvarar, og å gje norske solistar ein sjanse til å bli vurdert på eit internasjonalt nivå.

Daværende Kronprinsesse Sonja gratulerer Nigel Hill som vant den første finalen i det som den gang bar navnet Kronprinsesse Sonja internasjonale musikkonkurranse. Foto: Lars N. Sæthre, Aftenposten / NTB

I samband med 100-årsjubileet for Kirsten Flagstads fødsel i 1995 vart det bestemt at konkurransen det året skulle ha med berre songarar. Det vart svært vellukka, og sidan har dette vore ein songkonkurranse. Frå 2023 endra konkurransen namn frå Dronning Sonja Internasjonale musikkonkurranse til Dronning Sonja Sangkonkurranse.

 

11.10.2023

Del denne artikkelen på Facebook eller Twitter

Del på Twitter Del på Facebook
Fakta

Vinnarar av QSSC

Vinnarar av Dronning Sonja Sangkonkurranse (tidlegare Dronning Sonja Internasjonale Musikkonkurranse) sidan etableringa i 1988:

  • 2023: Jasmin White, kontra-alt (USA)
  • 2021: Maria Motolygina, sopran (Russland)
  • 2019: Sergey Kaydalov, baryton (Russland)
  • 2017: Seungju Mario Bahg, tenor (Sør-Korea)
  • 2015: Lise Davidsen, sopran (Norge)
  • 2013: Kristina Mkhitaryan, sopran (Russland)
  • 2011: Dong-Hwan Lee, baryton (Sør-Korea)
  • 2009: Seung-Gi Jung, baryton (Sør-Korea)
  • 2007: Audun Iversen, baryton (Norge)
  • 2005: Daniel Behle, tenor (Tyskland)
  • 2003: Olga Mykytenko, sopran (Ukraina)
  • 2001: Marita Kvarving Sølberg, sopran (Norge)
  • 1999: Virginia Tola, sopran (Argentina)
  • 1997: Liao Changyong, baryton (Kina)
  • 1995: Akie Amou, sopran (Japan)
  • 1992: Simone Pedroni, piano (Italia)
  • 1988: Nigel Hill, piano (Storbritannia)
Seungju Mario Bahg fra Sør-Korea vant i Dronning Sonja Internasjonale Musikkonkurranse 2017. Foto: Terje Bendiksby, NTB scanpix