Polarhistorie og mykje god song i Hareid

Talarstolen vart laga til dette besøket og 1000-årsmarkeringa av slaget ved Hjørungavåg. Slaget, som mest sannsynleg stod i 986, blir framleis markert på Sunnmøre.

Det er aller første gong Hans Majestet Kongen og Hennar Majestet Dronninga vitjar korbygda og industrikommunen

– Dronninga og eg har gledd oss lenge til å komme til Hareid, den siste kommunen på fylkesturen vår til Møre og Romsdal. Kronprinsparet var her på fylkestur i 2012, og vi høyrde mykje skryt frå den vitjinga, sa Kong Harald i talen på Tusenårsplassen i Hareid sentrum.

Les Kongens tale her

Gulliver Gryt (10 år) gjev blomar til Dronninga. Aminde Fiol Lillebø (6 år) gjev bok med teikningar til Kongen. Foto: Lise Åserud, NTB

Imponerande organisasjonsliv

Heile befolkninga i kommunen var invitert til folkefest, og eit imponerande organisasjonsliv fekk verkeleg sett sitt preg på programmet. Musikk- og kulturskulen slo an tonen med «Mellom bakkar og berg». Hareid Idrettslag fyller 100 år i år og markerte jubileet med turnoppvisning. Det lokale rap-kollektivet Kontrollert Kaos følgde på med god gammaldags «old school» rap, og bygdekoret framførte «Tidt eg minnest».

Hareid Idrettslag fyller 100 år i år og markerte jubileet med turnoppvisning. Foto: Liv Anette Luane, Det kongelege hoffet

Ultraløparen og hareidingen Therese Falk var den første av to talarar. På ti år har ho gjennomført ikkje mindre enn 100 maraton og 60 ultraløp. I dag var temaet hennar lokalidrett og frivilligheit.

Kong Harald løfta fram Therese Falks bragder i sin eigen tale og sa at Hareid er gode representantar for frivilligheita i dette som er Frivilligheitas år.

– At kommunen har over 50 aktive lag og organisasjonar – altså rundt eitt lag per hundre innbyggjarar – det er ganske imponerande, sa han. Kongen roste også mangfaldet av verksemder og bransjar i kommunen. 

Næringshistorie på Ishavsmuseet

Kongeparet reiste vidare til Ishavsmuseet i Brandal for å lære meir om selfangsten og ishavsfarten ut frå Hareid. Bygda var senter for all selfangst og polare ekspedisjonar frå heile Vestlandet i førre hundreår. Dei hadde moskusar på beite oppe i fjellet, isbjørn i bur på sjøbuene og kvalross symjande under sjøbugolvet i påvente av sal.

Kongen og Dronninga vitjar Ishavsmuseet på Brandal. Foto: Lise Åserud / NTB

På dekket til ishavsskuta «Aarvak» fortalde ordførar Bernt Brandal om polarhistoria og næringshistoria før og no. Kong Harald og Dronning Sonja snakka òg med ein representant for dagens ekspanderande næringsliv i kommunen. Stian Garnes presenterte selskapet DIMO, som leverer hydrauliske system og løysingar til maritim sektor. I 1995 var Garnes motormann på Kongeskipet «Norge», som Kongeparet har hatt som base under det tre dagar lange fylkesbesøket i Møre og Romsdal.

Kongeparet fekk selskinnstøflar i gåve frå kommunen, overrekt av Else Karlsen. Foto: Lise Åserud / NTB

Avsluttar med mottaking

I ettermiddag inviterer Kongen og Dronninga til ei avsluttande mottaking på Kongeskipet. Det blir om lag 70 gjester om bord – representantar frå alle dei fem kommunane Kongeparet har vitja desse dagane.